एरोस्पेस आणि संरक्षण क्षेत्रातील कंपनी पारस डिफेन्स अँड स्पेस टेक्नॉलॉजीज आपल्या शेअर्सचे विभाजन म्हणजेच स्टॉक स्प्लिट (Stock Split) करणार आहे. सध्याच्या १० रुपयांच्या दर्शनी मूल्याच्या शेअरचे ५ रुपये दर्शनी मूल्याच्या २ शेअर्समध्ये विभाजन होईल. या स्टॉक स्प्लिटसाठी रेकॉर्ड तारीख ४ जुलै २०२५ निश्चित करण्यात आली आहे. या तारखेपर्यंत ज्या शेअरहोल्डर्सकडे Paras Defense चे शेअर्स आहेत त्यांचे शेअर्स विभाजनासाठी पात्र असतील.
स्टॉक स्प्लिटमुळे पुढील आठवड्यात Paras Defense चे शेअर्स फोकसमध्ये असतील. या वर्षी ३० एप्रिल रोजी स्टॉक स्प्लिटची घोषणा करण्यात आली. २७ जून रोजी बीएसईवर या शेअरची किंमत जवळपास १ टक्क्यांनी वाढली. शेअर्स १६२९.८० रुपयांवर बंद झाला.
२ वर्षात १६० टक्के परतावा
पारस डिफेन्सचे मार्केट कॅप ६५०० कोटी रुपयांवर पोहोचले आहे. या शेअर्सने २ वर्षात १६० टक्के आणि ३ महिन्यांत ६७ टक्के परतावा दिला आहे. कंपनीमध्ये १९ मे २०२५ अखेर प्रवर्तकांचा ५३.७४ टक्के हिस्सा होता. बीएसईवर १९ जून २०२५ रोजी या शेअरचा ५२ आठवड्यांचा उच्चांक १,९४३.६० रुपये होता. तर ७ एप्रिल २०२५ रोजी ५२ आठवड्यांचा नीचांक ८०२ रुपये होता.
किंमत आयपीओ किमतीपेक्षा ८३१ टक्के जास्त
पारस डिफेन्सचा आयपीओ सप्टेंबर २०२१ मध्ये आला. आयपीओ ३०४.२६ पट भरला गेला. १ ऑक्टोबर २०२१ रोजी बीएसई, एनएसई वर शेअर्सचे लिस्टिंग झाले. आयपीओमध्ये शेअर्सची किंमत १७५ रुपये होती आणि बीएसईवर लिस्टिंगच्या दिवशी ट्रेडिंग बंद होताना शेअर किंमत ४९८.७५ रुपये होती. म्हणजेच गुंतवणूकदारांना लिस्टिंगला १८५ टक्के नफा मिळाला. शेअर्सची सध्याची किंमत ८३१ टक्के किंवा आयपीओ किमतीपेक्षा ९ पट जास्त आहे.
शेअर विभाजनानंतर पारस डिफेन्सच्या भागधारकांना २०२४-२५ या आर्थिक वर्षासाठी प्रति शेअर ०.५० रुपये अंतिम लाभांश मिळणार आहे. लाभांशासाठी भागधारकांची पात्रता निश्चित करण्यासाठी रेकॉर्ड तारीख अद्याप निश्चित झालेली नाही.
