पुण्यातील एका नामांकित ऑटोमोबाईल पार्ट्स विक्री करणाऱ्या कंपनीची 2.35 कोटी रुपयांची फसवणूक करण्यात आली आहे. ही फसवणूक अत्यंत कौशल्यपूर्ण “मॅन-इन-द-मिडल” सायबर हल्ला असल्याचे स्पष्ट झाले असून, सायबर गुन्हेगारांनी इटलीतील (Italian) एका बहुराष्ट्रीय कंपनीच्या अधिकाऱ्यांची बनावट ओळख तयार करून फसवे बँक खात्यात रक्कम वळती केली.
पोलिसांनी दिलेल्या माहितीनुसार, संबंधित पुणे कंपनी ही ऑटोमोबाईल पार्ट्स, मशीनिंग फिक्सचर्स, ड्रिलिंग ट्रॉलीज आणि कस्टमाइज्ड कॉम्पोनंट्स यांचे उत्पादन करते. त्यांनी इटलीतील एका प्रसिद्ध उत्पादन कंपनीकडून प्रेस बेंडिंग मशीन खरेदी करण्याचा सौदा केला होता. या यंत्राची किंमत अंदाजे 3.1 कोटी रुपये असून, 25% आगाऊ आणि उर्वरित 75% वितरणाच्या वेळी भरण्याचे अटीत होते.
मार्च 2025 मध्ये पुणे कंपनीने इटालियन कंपनीच्या भारतीय विक्री प्रतिनिधीला खरेदी आदेश पाठवला होता. त्यानुसार, एप्रिल व मे महिन्यात मिळून कंपनीने सुमारे 75 लाख रुपयांचे आगाऊ पेमेंट केले. मात्र, अंतिम पेमेंटपूर्वीच, पुणे कंपनीला एक ईमेल प्राप्त झाला. ज्यामध्ये मिलानस्थित बँक खाते तांत्रिक कारणाने बंद असल्याचे सांगून नवीन बँक तपशील व सुधारित प्रोफॉर्मा इनव्हॉईस पाठवण्यात आला.
या ईमेलचा पत्ता मूळ कंपनीच्या ईमेलसारखाच होता. मात्र, तो बनावट निघाला. प्रोफॉर्मा इनव्हॉईस आणि अन्य कागदपत्रेही मूळसारखीच तयार करून कंपनीची फसवणूक करण्यात आली. पोलिसांनी सायबर फसवणुकीचा गुन्हा दाखल करून पुढील तपास सुरू केला आहे. प्रकरणाचे गांभीर्य लक्षात घेता, सायबर सुरक्षा यंत्रणांनी सतर्क राहण्याचे आवाहन करण्यात आले आहे. मात्र, या घटनेने मोठी खळबळ उडाल्याचे बघायला मिळत आहे. पोलिसांनी या प्रकरणी तपास सुरू केला असून पुढे काय कारवाई होते हे पाहण्यासारखे ठरणार आहे.
