AI चा उपयोग फक्त उत्तरं देण्यासाठी नाही, तर विद्यार्थ्यांना विचार करायला शिकवण्यासाठीही होतो, हे OpenAI ने दाखवून दिलंय. ChatGPT मध्ये आता एक नवीन फीचर (Feature) लाँच झालं आहे. ‘Study Mode’ हे फीचर विद्यार्थ्यांसाठी खास डिझाइन केलं गेलं असून, ते त्यांच्या अभ्यासाच्या पद्धतीत मोठा बदल घडवून आणणार आहे.
Study Mode ही एक अशी प्रणाली आहे जिथे ChatGPT आता थेट उत्तर देणार नाही. त्याऐवजी, तो विद्यार्थ्यांशी संवाद साधेल, प्रश्न विचारेल, हिंट्स देईल, आणि त्यांना स्वतःहून उत्तर शोधण्याचा प्रयत्न करायला लावेल. यामुळे त्यांचा विचार करण्याचा, समजून घेण्याचा आणि समस्यांवर काम करण्याचा दृष्टिकोन विकसित होईल.
OpenAI च्या म्हणण्यानुसार, Study Mode चा उद्देश विद्यार्थ्यांना फक्त शॉर्टकट उत्तरं देण्यापेक्षा, अभ्यासात सक्रिय भागीदारी घडवून आणणं आहे. नुकत्याच एका अभ्यासात हे समोर आलं की जे विद्यार्थी निबंधासाठी AI चा वापर करतात, त्यांची मेंदू सक्रियता कमी असते, कारण ते स्वतः काहीच विचार करत नाहीत. हीच सवय मोडण्यासाठी आणि शिक्षण अधिक अर्थपूर्ण करण्यासाठी Study Mode आणलं गेलंय.
ही सुविधा सध्या सर्व ChatGPT युजर्ससाठी उपलब्ध आहे. मग तुम्ही फ्री प्लानवर असाल, की Plus, Pro किंवा Team प्लानवर. लवकरच, हे ChatGPT Edu सब्सक्रायबर्ससाठीही सुरू केलं जाईल. महत्त्वाची गोष्ट म्हणजे, Study Mode पूर्णतः वैकल्पिक आहे. म्हणजेच, तुम्हाला वाटेल तेव्हा तुम्ही ते बंद करून पूर्वीसारखा सामान्य मोड वापरू शकता. सध्या पालक किंवा शाळांना हे लॉक करण्याचा पर्याय नाही, पण भविष्यात तो दिला जाऊ शकतो.
Anthropic या कंपनीने Claude AI मध्ये Learning Mode दिल्यानंतर, OpenAI कडून आलेला हा Study Mode विद्यार्थ्यांना नव्या प्रकारे शिकायला लावणार आहे. आजच्या डिजिटल युगात AI हा शिक्षकाचा एक सहकारी बनू शकतो, हे ChatGPT च्या Study Mode ने स्पष्ट केलं आहे. विद्यार्थी आता फक्त उत्तरं न घेता, विचार करतील, शंका विचारतील आणि खरं अर्थाने शिकतील.
