भारतीय क्रिकेट टीमचा स्टार श्रेयस अय्यरवर दुखापतीमुळे ऑस्ट्रेलियामध्ये उपचार सुरु आहेत. सिडनी क्रिकेट ग्राऊंडवर तिसऱ्या वनडे मॅच दरम्यान ऑस्ट्रेलियाई विकेटकीपर एलेक्स कॅरीची कॅच पकडताना अय्यर पडला होता. या दुर्घटनेत त्याला स्पिलिनची इंजरी झालेली. त्यानंतर त्याला ऑस्ट्रेलियातील रुग्णालयात दाखल करण्यात आलं. आता श्रेयस अय्यर बद्दल एक आनंदाची बातमी आहे. त्याला रुग्णालयातून डिस्चार्ज मिळाला आहे. बीसीसीआयने अय्यर बद्दल एक मोठी अपडेट शेअर केली आहे.
श्रेयस अय्यर 25 ऑक्टोंबरपासून रुग्णालयात दाखल होता. मॅच दरम्यानच त्याला गंभीर दुखापत झाल्याच लक्षात आलं. त्याला तात्काळ रुग्णालयात नेण्यात आलं. सुरुवातीला त्याला आयसीयूमध्ये ठेवलं होतं. बीसीसीआयच्या मेडिकल टीमने सिडनी आणि भारतीय तज्ज्ञांसोबत मिळून श्रेयसवर उपचार केले. सध्या त्याची हालत स्थिर आहे. तो वेगाने रिकव्हर होतोय.
बीसीसीआयने अय्यरवर अपडेट शेअर करताना सांगितलं की, श्रेयस अय्यरला 25 ऑक्टोंबर 2025 रोजी ऑस्ट्रेलिया विरुद्ध तिसऱ्या वनडे मॅचमध्ये फिल्डिंग करताना पोटाला दुखापत झालेली. स्पिलिनमध्ये दुखापत झाल्याने अंतर्गत रक्तस्त्राव झाला. दुखापत कुठे झालीय, ते समजल्यानंतर लगेच छोटसं ऑपरेशन करुन ब्लीडिंग तात्काळ थांबवण्यात आलं. योग्य उपचार झाले. त्याची प्रकृती आता स्थिर असून तो रिकव्हर होतोय. बीसीसीआयची मेडीकल टीम, सिडनी आणि भारतीय तज्ज्ञ त्याच्या प्रकृतीतील सुधारणेमुळे खुश आहेत. त्याला रुग्णालयातून डिस्चार्ज देण्यात आला आहे.
डॉ. कौरौश हाघीगी आणि भारतातील डॉ. दिनशॉ पारडीवाला यांचे बीसीसीआयने आभार मानले आहेत. त्यांनी श्रेयसवर चांगले उपचार होतील याची काळजी घेतली. श्रेयस पुढच्या सल्ल्यासाठी सिडनीमध्येच थांबेल. अय्यर पुढचे काही दिवस ऑस्ट्रेलियामध्येच असेल. पूर्णपणे फिट झाल्यानंतरच तो भारतात येईल असं बीसीसीआयने प्रेस रिलीजमध्ये म्हटलं आहे.
