अ श्रेणी तील अधिकारी लाच लुचपत प्रतिबंधक विभागाच्या जाळ्यात अडकल्याने क्रीडा क्षेत्रासह अन्य विभागातील शासकीय अधिकाऱ्यांमध्ये एकच खळबळ उडाली आहे. चंद्रशेखर विश्वनाथ साखरे असे लाच घेताना जाळत सापडलेल्या क्रीडा अधिकाऱ्यांचे नाव आहे. साखरे यांनी ८ लाख ८९ हजार २०० रुपयांचे बिल पास करण्यासाठी पंधरा टक्के लाच मागितल्याचे आणि तडजोडीअंती १ लाख १० हजाराची रक्कम स्वीकारताना चंद्रशेखर साखरे हे लाचलुचपत प्रतिबंधक विभागाच्या जाळ्यात सापडले आहेत.
कोल्हापुरातील अ श्रेणी जिल्हा क्रीडा अधिकारी म्हणून काम करणारे चंद्रशेखर विश्वनाथ साखरे हे आज तब्बल एक लाख दहा हजार रुपये लाच स्वीकारताना लाच लुचपत प्रतिबंधक विभागाच्या जाळ्यात सापडले आहेत. लाच लुचपत प्रतिबंधक विभागाकडून मिळालेल्या माहितीनुसार, तक्रारदार हा वेगवेगळ्या सरकारी विभागात साहित्य पुरवठा करण्याचे काम करतात. त्यांनी ऑनलाईन महा टेंडर वरती कोल्हापूर जिल्हा क्रीडा कार्यालयास आवश्यक असलेले साहित्य हे ऑनलाईन टेंडर वरती आलेल्या जाहिरातीनुसार पुरवले होते.
दरम्यान या साहित्याचे एकूण बिल ८ लाख ८९ हजार २०० रुपये झाले होते. सदरचे बिल मंजूर करण्यासाठी तक्रारदाराने जिल्हा क्रीडा अधिकारी चंद्रशेखर विश्वनाथ साखरे यांना विनंती केली. मात्र, सदर बिल मंजूर करण्यासाठी चंद्रशेखर साखरे यांनी बिल रकमेच्या 15 टक्के म्हणजे १ लाख २७ हजार ९५० रुपयांची लाच मागितली. मात्र, तडजोडी अंती १ लाख १० हजार रुपये त्यांनी मागितले.
दरम्यान, याबाबतची तक्रार तक्रारदाराने लाचलुचपत प्रतिबंधक विभागाकडे केली. यावेळी लाच लुचपत प्रतिबंधक विभागाचे पोलीस उपअधीक्षक सरदार नाळे यांच्यासह बापू साळुंखे, पोलीस निरीक्षक संजय बंबरगेकर यांच्यासह संपूर्ण टीमने आज दुपारी सापळा रचला. चंद्रशेखर साखरे हा यावेळी १ लाख १० हजार रुपये लाच स्वीकारताना लाच लुचपत प्रतिबंधक विभागाच्या जाळ्यात सापडला.
दरम्यान, या प्रकरणी साखरे यांच्या विरोधात जुना राजवाडा पोलीस ठाण्यात गुन्हा दाखल करण्याचे काम सुरू करण्यात आले. लाख लुचपत प्रतिबंधक विभागाची ही या वर्षातील सर्वात मोठी कारवाई करण्यात असल्याने यामुळे शासकीय अधिकारी वर्गात एकच खळबळ उडाली असून अनेक अधिकाऱ्यांचे धाबे दणाणले आहेत.
