लोकसभेच्या आगामी निवडणुकीसाठी सर्वच पक्षांकडून प्रयत्न सुरू आहेत. राज्यातील शिंदे, फडणवीस, पवार सरकारमधील सहभागी महायुतीतर्फे डिसेंबर २०२३ मध्ये कोल्हापुरात केंद्रीय गृहमंत्री अमित शहा यांच्या उपस्थितीमध्ये लोकसभेच्या प्रचाराचा शुभारंभ होणार आहे. भाजप ,शिवसेना शिंदे गट, अजित पवार राष्ट्रवादी गट यांच्यातर्फे संयुक्त जाहीर सभेचे आयोजन केले आहे. वैद्यकीय शिक्षणमंत्री हसन मुश्रीफ यांनी कोल्हापूर येथे पत्रकार परिषदेत बोलताना यासंबंधी सूतोवाच केले.
डिसेंबर महिन्यामध्ये कोल्हापुरात सहकार परिषदेचे आयोजन केले जाणार आहे. कोल्हापूर जिल्हा मध्यवर्ती सहकारी बँकेच्या विस्तारित इमारतीचे उद्घाटनच्या निमित्ताने सहकार परिषद होत आहे. शिवाय राज्य सरकारच्या वतीने कोल्हापुरात अकराशे बेडचे अद्यावत हॉस्पिटल उभारण्यात येणार आहे. त्या हॉस्पिटलच्या भूमिपूजनाचा समारंभही होणार आहे. या दोन्ही कार्यक्रमाला केंद्रीय गृहमंत्री आणि सहकारमंत्री अमित शहा यांना आमंत्रित केले जाणार आहे. त्यांच्या उपस्थितीमध्ये त्या दिवशी सायंकाळी महायुतीची जाहीर सभा होणार आहे. त्या दृष्टीने प्रयत्न सुरू आहेत. महायुतीची जाहीर सभा म्हणजे आगामी लोकसभा निवडणुकीच्या प्रचाराचा शुभारंभ ठरेल, असे मंत्री मुश्रीफ यांनी सांगितले.
पत्रकार परिषदेमध्ये बोलताना मुश्रीफ यांना पत्रकारांनी, काँग्रेसचे आमदार सतेज पाटील व आपल्यातील मैत्री यासंबंधी विचारले असता ते म्हणाले, ” मैत्री मैत्रीच्या ठिकाणी आणि राजकारण राजकारणाच्या ठिकाणी यामुळे आगामी लोकसभा व विधानसभा निवडणुकीमध्ये मुश्रीफ महायुतीच्या उमेदवारांना प्रामाणिकपणाने मदत केलेले असेल ही दिसून येईल. सहकारामध्ये इकडून तिकडे होत असते. मात्र विधानसभा आणि लोकसभेच्या निवडणुकीत मैत्री आणि राजकारण वेगळे असेल.”
भारतीय जनता पक्षाचे नेते समरजितसिंह घाटगे यांनी भाजपच्या मेहरबानीमुळे मुश्रीफ हे पालकमंत्री झाले आहेत अशी टीका केली होती. त्यावर बोलताना मुश्रीफ म्हणाले, ” उपमुख्यमंत्री अजित पवार यांनी भाजपला पाठिंबा देताना स्पष्ट केले आहे की, २०२४ च्या लोकसभा निवडणुकीत पंतप्रधान नरेंद्र मोदी यांना साथ देण्यासाठी आणि राज्याच्या विकासासाठी आम्ही भाजपसोबत जात आहोत. दरम्यान माझ्या पालकमंत्री होण्याने समरजीत सिंह घाटगे यांना ज्या वेदना, यातना होतात ते मी समजू शकतो.”असा टोलाही त्यांनी लगावला.
कोल्हापूरच्या हददवाढीसह अनेक प्रश्न सोडवणार
पालकमंत्री म्हणून आपल्याकडे दहा महिन्याचा कालावधी आहे. या दहा महिन्याच्या कालावधीत कोल्हापूरची निगडित प्रश्नांच्या सोडवणुकीला आपले प्राधान्य राहील. कोल्हापूर शहरालगतची जी गावे आहेत त्यांचा समावेश करून हद्दवाढ वाढणार आहे. त्याशिवाय करवीर निवासिनी अंबाबाई विकास आराखडा, पंचगंगा नदी प्रदूषण, खंडपीठ, शाहू मिलमध्ये आंतरराष्ट्रीय शाहू स्मारक असे विविध विषय मार्गी लावण्यासाठी प्रयत्नशील राहीन.”
