शहराबाहेर उत्तरेकडे असलेल्या न्यू टाऊनमध्ये एका एमबीबीएसच्या विद्यार्थ्याचा मृतदेह सापडला. विद्यार्थी एका घरात भाड्यानं राहत होता. त्याच घरातील सूटकेसमध्ये त्याचा मृतदेह लपवण्यात आला होता. त्याच्या तोंडावर चिकटपट्टी लावण्यात आलेली होती. साजिद हुसेन असं मृत तरुणाचं नाव असून तो १९ वर्षांचा होता. बाजेखाली असलेल्या सूटकेसमध्ये साजिदचा मृतदेह सापडला.
साजिद राहत असलेल्या घराच्या मालकाला पोलिसांनी अटक केली आहे. गौतम असं त्याचं नाव आहे. त्याच्याशिवाय आणखी एकाला बेड्या ठोकण्यात आल्या आहेत. स्थानिक रेस्टॉरंटचा मालक असलेल्या पप्पू सिंहलादेखील पोलिसांनी अटक केली आहे. पश्चिम बंगालच्या मालदा जिल्ह्यातील वैष्णवनगरचा रहिवासी असलेला साजिद परिक्षेच्या तयारीसाठी कोलकाता शहराच्या बाहेर असलेल्या न्यू टाऊन परिसरात राहत होता.
४ ऑक्टोबरपासून साजिदशी संपर्क होत नव्हता. त्याचा फोन संपर्क क्षेत्राच्या बाहेर होता. त्याच्या कुटुंबियांनी मित्र परिवाराशी, नातेवाईकांशी संपर्क साधून साजिदचा ठावठिकाणा शोधण्याचा प्रयत्न केला. पण काहीच हाती लागलं नाही. अखेर त्यांनी कोलकाता गाठून न्यू टाऊन पोलीस ठाण्यात तक्रार नोंदवली. ४ ऑक्टोबरला एका अज्ञात नंबरवरुन खंडणीसाठी कॉल आल्याची माहिती त्यांनी पोलिसांना दिली.
पोलिसांनी तपास सुरू केला. त्यांनी साजिद राहत असलेलं घर गाठलं. घराची झाडाझडती घेतली. एका सूटकेसमध्ये साजिदचा मृतदेह सापडला. त्याच्या तोंडावर चिकटपट्टी होती. पोलिसांनी घरमालक गौतमला ताब्यात घेतलं. कसून चौकशी केली असता त्यानं गुन्ह्याची कबुली दिली. साजिदला दारु पाजली. त्यानंतर त्याचा गळा आवळून खून केल्याचं त्यानं पोलिसांना सांगितलं. या गुन्ह्यात स्थानिक रेस्टॉरंट मालकाचाही हात असल्याची माहिती त्यानं पोलिसांना दिली. त्यानंतर रेस्टॉरंट मालकालादेखील अटक करण्यात आली. आता पोलीस हत्येमागचं कारण शोधत आहेत.
