सध्या नेते मंडळींचे दौरे अनेक गावागावात सुरु आहेतच. तसेच मोर्चेबांधणी देखील सुरु आहे. राज्याचे उपमुख्यमंत्री अजित पवार शनिवारी (दि. १०) गडहिंग्लज दौऱ्यावर येणार असून, सकाळी आठ वाजता नूल येथील सुरगीश्वर सांस्कृतिक भवनाचे भूमिपूजन त्यांच्या हस्ते होणार असल्याची माहिती चंदगड मतदार संघाचे आ. राजेश पाटील व सुरगीश्वर मठाचे मठाधिपती गुरुसिद्धेश्वर शिवाचार्य महास्वामी यांनी पत्रकार परिषदेत दिली.
आ. पाटील म्हणाले, चंदगड विधानसभा मतदारसंघात आजवर कोट्यवधींची विकासकामे ना. पवार यांच्यामुळेच करू शकलो आहे. त्यांच्याच हस्ते या नव्या सांस्कृतिक भवनाचे भूमिपूजन होणार असून, यावेळी त्यांचा नागरी सत्कार केला जाणार आहे.
धनंजय मुंडे, पालकमंत्री हसन मुश्रीफ, खा. संजय मंडलिक यांची प्रमुख उपस्थिती असणार आहे. इंदिरादेवी जाधव न्यू इंग्लिश स्कूलच्या पटांगणावर शेतकरी मेळावा पार पडणार आहे. ना. पवार हे हेलिकॉप्टरने नूलच्या कार्यक्रमस्थळी पोहोचणार आहेत. या ठिकाणचा कार्यक्रम आटोपून ते चंदगड येथील कार्यक्रम झाल्यावर मुंबईकडे रवाना होणार आहेत.
