आगामीलोकसभा निवडणुकी आधी महायुती आणि मविआच्या जागावाटपाकडे सर्वांचं लक्ष लागलं आहे. आता राज्यातील राजकीय समीकरण बदलली आहेत. मुख्यमंत्रा एकनाथ शिंदे, उपमुख्यमंत्री अजित पवार आणि उपमुख्यमंत्री देवेंद्र फडणवीस तिन्ही बडे नेते आहेत. लोकसभा निवडणुकीमध्ये महायुती मोठ्या ताकदीने उतरेल मात्र शिंदेंच्या शिवसेनेला, पवारांच्या राष्ट्रवादीला किती जागा मिळणार? जागावाटपाचा फॉर्म्युला कसा असणार याबाबत टीव्ही9 मराठीच्या लोकसभा महासंग्राम या कार्यक्रमात देवेंद्र फडणवीस काय म्हणाले जाणून घ्या.
आम्ही तिघं एकत्र बसतोय, तत्त्व एकच ठरवलं. जागांचं जास्त अडून धरायचं नाही. जो निवडून येईल त्याने लढवायचं. त्यामुळे तिघांसोबत न्याय होईल. संख्येसाठी लढत नाही. मोदींच्या पाठी महाराष्ट्र खंबीरपणे उभा राहिला पाहिजे. कुणाला किती जागा मिळते, कोण तिथे निवडून येईल या गोष्टी गौण आहे. भाजप कमळावर, शिंदे धनुष्यबाण आणि अजितदादा घडाळ्यावरच लढणार असल्याचं देवेंद्र फडणवीस यांनी स्पष्ट केलं.
मी उपाशी होतो, ताबा सुटला असं जरांगे म्हणाले त्यामुळे सोडून द्या. जरांगे तर बिचारे नवीन आहेत. जेव्हा काही सापडत नाही तेव्हा शरद पवार साहेबही जातीवर जातात. संभाजीराजेंना तिकीट दिलं तेव्हा पूर्वी छत्रपती पेशवे नेमायचे आता पेशवे छत्रपती नेमत आहेत असं पवार म्हणाले होते. माझ्यावर भ्रष्टाचाराचे आरोप लावता येत नाही त्यामुळे जातीवरून आरोप होतात. पण जातीपातीत महाराष्ट्र अडकणार नसल्याचं फडणवीस यांनी सांगितलं.
