महायुतीकडून अखेर हातकणंगले लोकसभा मतदारसंघासाठी खासदार धैर्यशील माने यांची उमेदवारी जाहीर झाल्याने त्यांची लढत माजी खासदार राजू शेट्टी यांच्याशी होणार आहे.
आमदार प्रकाश आवाडे यांचे पुत्र माजी जिल्हा परिषद सदस्य राहुल आवाडे स्वतंत्र रिंगणात उतरणार की, कोणाची उमेदवारी घेणार, याकडे लक्ष आहे.माजी मंत्री सदाभाऊ खोत यांची भूमिका महत्त्‍वाची ठरणार आहे. त्यातच बहुजन वंचित आघाडीने उमेदवार जाहीर केल्याने लढत आणखी तुल्यबळ होण्याची शक्यता आहे.
माने यांच्यासमोर पुन्हा एकदा राजू शेट्टी (Raju shetti) यांच्यासारखा प्रबळ उमेदवार आहे. गेल्या निवडणुकीत पराभूत झाल्यानंतरही ते आंदोलनाच्या माध्यमातून सक्रिय राहिले आहेत. सध्या शेट्टी यांनी ‘एकला चलो रे’ ची भूमिका घेतली आहे.
पण, ठाकरे गटाच्या शिवसेनेचा पाठिंबा मिळविण्यासाठी त्यांची धडपड सुरू आहे. महाविकास आघाडीने (Mahavikas Aghadi) शेट्टी यांना अधिकृतपणे पाठिंबा दिल्यास महाराष्ट्रातील एक तुल्यबळ लढत पाहावयास मिळणार आहे.
