सांगलीच्या जागेवरचा तेढ कधी सुटणार?, मविआचा उमेदवार कोण? याची चर्चा सांगलीसह राज्याच्या राजकीय वर्तुळात होत आहे. अशातच शिवसेना ठाकरे गटाचे उमेदवार चंद्रहार पाटील आणि संजय राऊत सांगलीहून मुंबईसाठी रवाना झाले आहेत. चंद्रहार पाटील यांच्या प्रचारासाठी राऊत सांगलीत गेले होते.
आता संजय राऊत यांच्यासोबत चंद्रहार पाटील हेलिकॉप्टरने मुंबईला रवाना झाले आहेत. शिवसेना काही उमेदवारांची बैठक आणि सांगली-कोल्हापूरवासीयांची बैठक असल्याने चंद्रहार पाटील मुंबईला येत असल्याचं संजय राऊत यांनी सांगितलं आहे.आज सकाळीच काँगेस हायकमांडशी बोलणं झालं आहे. त्यामुळे चंद्रहार पाटील हेच उमेदवार असतील, हे जबाबदारीने बोलतो आहे. शेवटपर्यंत आघाडीमध्ये पेच आहे.
पण एकमेकांशी चर्चा करून तो सोडवला जाईल. काही ठिकाणी शिवसेना, काही ठिकाणी काँग्रेस लढण्यासाठी आग्रह आहे. पण वरिष्ठ पातळीवरून कार्यकर्त्यांना सांगायचं असतं. त्यामुळे सगळ्या पक्षाचे नेते मिळून याबाबत निर्णय घेतील, असं संजय राऊत म्हणाले.
