तोरणानगर- आर. के. नगर भागातील मैदानावर पाच ते सहाजणांच्या टोळक्याने लाकडी बांबू आणि दगडाने मारहाण करून सर्व्हिस सेंटरचालकाला गंभीर जखमी केले. वाजीद जब्बरुला मुजावर (रा. जिजामाता पार्क शहापूर) असे जखमी युवकाचे नाव आहे. यावेळी आरडाओरडा ऐकून नागरिक मदतीसाठी धावल्याने हल्लेखोरांनी पलायन केले. वाजीद मुजावर याचे दुचाकी- चारचाकी गाड्यांचे सर्व्हिसींग सेंटर आहे.
मंगळवारी सायंकाळी तो तोरणानगर- आर. के. नगर रस्त्यावरून जात असताना अचानक ५-६ जणांच्या टोळक्याने त्याला अडवत लाकडी बांबू आणि दगडाने मारहाण करण्यास सुरुवात केली. रक्तबंबाळ अवस्थेतील जखमी वाजीद याला नागरिकांनी उपचारासाठी इंदिरा गांधी सामान्य रुग्णालयात दाखल केले. या घटनेची माहिती मिळताच शहापूर आणि शिवाजीनगरचे पोलीस रुग्णालयात दाखल झाले. यावेळी नातेवाईकांनीही रुग्णालय परिसरात गर्दी केली होती.
जखमीवर प्राथमिक उपचार करून त्यास पुढील उपचारासाठी कोल्हापुरला हलविले आहे. सदरचा प्रकार मंगळवारी सायंकाळच्या सुमारास घडला. हा हल्ला पैशाच्या देवाण-घेवाणीतून झाला असावा अशी चर्चा परिसरात सुरू होती. याप्रकरणी रात्री उशीरापर्यंत पोलिस ठाण्यात गुन्हा दाखल करण्याचे काम सुरु होते.
