हातकणंगले लोकसभा मतदारसंघाच्या आढाव्यासाठी मंत्री पाटील कोल्हापुरात आले आहेत. नागपूर- गोवा शक्तीपीठ महामार्गासाठी राज्यात भूसंपादन होणार नाही. हा विषय संपला असल्याची घोषणा भाजप नेते उच्च व तंत्रशिक्षणमंत्री चंद्रकांत पाटील यांनी गुरुवारी केली. मुलींच्या व्यावसायिक शिक्षणाच्या फी माफीबद्दलचा शासन आदेश पदवीधर निवडणुकीच्या आचारसंहितेनंतर निघेल असेही त्यांनी स्पष्ट केले.
ते म्हणाले, शक्तिपीठाबाबत राज्य शासनाने निर्णय घेतला असून, त्यासाठी भूसंपादन होणार नाही. तो विषय आता संपला आहे. आता काही जण आंदोलन सुरूच ठेवत आहेत. त्याला काय करणार. मुलींच्या व्यावसायिक फी माफीचा निर्णय शासनाने घेतला आहे; परंतु कोकण पदवीधर निवडणुकीच्या आचारसंहितेमुळे शासन आदेश निघू शकला नाही. तसेही या व्यावसायिक अभ्यासक्रमांच्या प्रवेशांना अजूनही महिना आहे. त्याआधीच शासन आदेश निघेल.
