तहसीलदारांच्या कक्षात स्वतःला कोंडून घेऊन एका तरुणाने (Diesel)आत्मदहन करण्यासाठी डिझेल ओतून घेण्याचा धक्कादायक प्रकार सांगली जिल्ह्यातील शिराळा येथे घडला आहे. देवेंद्र धस असे या तरुणाचे नाव असून तो मराठ्यांना आरक्षण मिळण्यासाठी आंदोलन करत आहे. मराठ्यांना आरक्षण मिळावे यासाठी त्याने आजपासून शिराळा तहसीलदार कार्यालयासमोर उपोषणास सुरुवात केली आहे.
मिळालेल्या माहितीनुसार, देवेंद्र धस याने शिराळा तहसीलदार यांच्या कक्षात जाऊन (Diesel) हा कक्ष खुर्च्या लावून बंद केला. त्याचवेळी तहसीलदार शामला खोत-पाटील या कार्यालयात आल्या. तेथून त्यांनी काही पोलीस अधिकाऱ्यांना फोन लावले. त्यांनी तहसीलदार कक्षात प्रवेश केला. मात्र दरवाजा आतून कडी नसल्याने खुर्च्या लावून बंद केला होता. कार्यालय सुरू होण्यापूर्वी ही घटना घडली. त्यानंतर ही बातमी वाऱ्यासारखी पसरली.
या कार्यालयाजवळ पोलीस निरीक्षक सिद्धेश्वर जंगम, सहाय्यक पोलीस निरीक्षक जयसिंगराव पाटील, माजी ग्रामपंचायत सदस्य अजय जाधव , जैन महासभेचे विकास शहा, रयत क्रांती संघटनेचे तालुकाध्यक्ष सत्यजित कदम, विनोद कदम, पत्रकार, पोलीस आले. दरवाजा बंद असल्याने त्यांनी खिडकीतून देवेंद्र धस यांना समजावण्याचा प्रयत्न केला. तहसीलदार शामला खोत पाटील यांनीही बाहेरून पंधरा मिनिटे समजावण्याचा प्रयत्न केला. त्यानंतर देवेंद्र यांनी तहसीलदार शामला खोत या एकट्याच आत याव्यात, माझ्या व्यथा समजून घ्याव्यात, अशी भूमिका घेतली. यावेळी तहसीलदार कक्षात कोणतीही पर्वा न करता तहसीलदार शामला खोत गेल्या.यावेळी बाहेर उपस्थित अधिकारी, पोलीस यंत्रणा, नागरिक यांच्यात भीतीचे वातावरण निर्माण झाले. कारण कोणत्याही संरक्षणाशिवाय तहसीलदार शामला खोत या एकट्याच आत गेल्या होत्या. यादरम्यान पोलिसांनी अग्निशमन यंत्रणा, घोंगडे आदी आग विझविण्यासाठीची यंत्रणा सज्ज ठेवली होती. अखेर २० मिनिटे समजावून सांगितल्यानंतर कक्षाचा दरवाजा उघडण्यात आला. यावेळी सर्व उपस्थितांनी निश्वास टाकला. त्यानंतर देवेंद्र धस पुन्हा उपोषणास बसले आहेत. पत्नीला आणि त्याला स्वतःला आजवर २० परीक्षा देऊनही २,४ गुण कमी पडल्याने नोकरीं मिळत नाही. आरक्षण असते तर यापूर्वीच नोकरी मिळाली असती, असे मत देवेंद्र धस याने व्यक्त केले आहे.
