विधानसभा निवडणुकीसाठी सर्वच पक्षांनी कंबर कसली आहे. उमेदवार चाचपणीसाठी सुरूवातही झालेली आहे. सोलापूर जिल्ह्यातील माळशिरस विधानसभा मतदारसंघातून ज्येष्ठ नेते उत्तम जानकर यांना उमेदवारी मिळण्याचे संकेत दिले आहे.त्याबाबत राष्ट्रवादी काँग्रेस शरदचंद्र पवार पक्षाचे प्रदेशाध्यक्ष जयंत पाटील यांनी सूचक विधान केले आहे.
राष्ट्रवादी शरद पवार गटाची शिवस्वराज्य यात्रा सोमवारी माळशिरसमध्ये होती. त्यावेळी जयंत पाटील म्हणाले, महाविकास आघाडीत अद्याप जागा वाटपाबाबत चर्चा झालेली नाही. त्यामुळे येथून आत्ताच उमेदवार घोषित करणे उचित ठरणार नाही. पण उत्तम जानकरांनी आता महाराष्ट्रभर फिरले पाहिजे. आमच्याकडे आता चांगले वक्ते, नेते राहिले नाहीत. ते निघून गेले आहेत.
पक्षात फूट पडल्यानंतर आम्ही नवीन नेतृत्व, नेते तयार करण्यावर भर देत आहोत. त्यामुळे जानकर यांनी सातारा, सोलापूर, सांगलीसह राज्यभर फिरावे. तुम्ही येथून 400 टक्के निवडून याल, यात काही वाद नाही. पण तुम्ही फिरले पाहिजे, असे म्हणत पाटील यांनी माळशिरसमधून जानकरांची उमेदवारी फिक्स असल्याचे अप्रत्यक्षरित्या सांगितले.
