पत्नीला आणण्यासाठी दुचाकीवरून जाणाऱ्या पतीचा चारचाकी गाडीच्या धडकेत झालेल्या अपघातात मृत्यू झाला.जयपाल सिद्धाप्पा बेळवी ( वय ५४ रा. राजीवगांधीनगर, जयसिंगपूर) असे मृताचे नाव आहे. अपघातानंतर त्याला त्वरित उपचारासाठी सीपीआर रुग्णालयात हलवले. मात्र, त्यांचा मृत्यू झाला.
याबाबतची नोंद शहापूर पोलिस ठाण्यात झाली. याप्रकरणी अज्ञात चालकावर गुन्हा दाखल केला आहे. ही घटना इचलकरंजी – यड्राव फाटा मार्गावर एसआयटी कॉलेज जवळ घडली.
जयपाल बेळवी हे रविवारी (ता.25) दुपारी चार वाजण्याच्या सुमारास यड्राव मार्गे माणकापूर येथे मोटरसायकलवरून पत्नीला आणण्यासाठी निघाले होते. एसआयटी कॉलेजजवळ ओंकारेश्वर देवस्थान कमानीजवळ आल्यानंतर त्यांच्या मोटारसायकलला समोरून येणाऱ्या चारचाकी वाहनाने जोराची धडक दिली. धडक दिल्यानंतर भरधाव असणारा चारचाकी चालक याठिकाणी न थांबता तसाच निघून गेला.
अपघातात गंभीर जखमी झालेल्या जयपाल बेळवी यांना उपचारासाठी कोल्हापुरातील सीपीआर रुग्णालयात दाखल केले. मात्र, उपचारदरम्यान त्यांचा मृत्यू झाला. याबाबतची फिर्याद त्यांचा मुलगा आदर्श जयपाल बेळवी (वय 26) याने शहापूर पोलिस ठाण्यात दिली आहे.
