भारतातील सर्वात मौल्यवान कंपनी, रिलायन्स इंडस्ट्रीजचे सर्वेसर्वा (RIL) आणि अब्जाधीश उद्योगपती मुकेश अंबानी यांनी शेअर मार्केटमधील कंपनीच्या गुंतवणूकदारांसाठी मोठी घोषणा केली आहे. रिलायन्स इंडस्ट्रीज एका शेअरवर एक बोनस देण्याची तयारी करत असून पुढील आठवड्यात ५ सप्टेंबर रोजी बोर्डाच्या बैठकीत बोनस शेअर्सवर अंतिम निर्णय घेतला जाईल. कंपनीच्या शेअर्समध्ये जोरदार वाढ झाली असून शेअरची किंमत २% वाढून ३,०६० रुपये झाली आहे.
रिलायन्सच्या ४७ व्या वार्षिक सर्वसाधारण सभेत (AGM) शेरधारकांना उद्देशून रिलायन्स इंडस्ट्रीजचे अध्यक्ष मुकेश अंबानी म्हणाले की १:१ बोनस शेअर्सचा ५ सप्टेंबर रोजी बोर्डात विचार केला जाईल. RIL चे उद्दिष्ट अल्पकालीन नफा मिळवणे नाही तर देशासाठी संपत्ती निर्माण करण्याचे आहे.
रिलायन्स इंडस्ट्रीजने १ जानेवारी २००० पासून शेअर्सचे दर्शनी मूल्य संपली केलेले नाही. मात्र, २६ नोव्हेंबर २००९ पासून कंपनीने दोनदा बोनस शेअर्स जारी केले असून कंपनीने दोन्ही काळात १:१ रेशिओसह बोनस शेअर्सची गुंतवणूकदारांना भेट दिली. कंपनीने शेवटची ७ सप्टेंबर २०१७ एक्स-डेटसह बोनसची घोषणा केली होती तर सध्या बीएसईवर रिलायन्सचे शेअर्स २.११% वाढून ३,०५९ रुपयांवर व्यवहार करत होते.
मुकेश अंबानींची ही घोषणा कंपनीच्या भागधारकांसाठी महत्त्वाची ठरू शकते ज्याचा थेट फायदा भागधारकांना होईल. बोनस इश्यू सहसा कंपन्या शेअरधारकांना बक्षीस देण्याचा आणि शेअर्सची लिक्विडीटी वाढवण्याच्या उद्देशाने जारी करतात. रिलायन्सने आपल्या महत्त्वाच्या योजनेची माहिती शेअर बाजारांना दिल्याने गुंतवणूकदार आणि बाजारामध्ये खळबळ उडाली आहे.
एजीएममध्ये मुकेश अंबानी म्हणाले की, रोजगार आघाडीवर, रिलायन्स नवीन प्रोत्साहन आधारित प्रतिबद्धता मॉडेलवर काम करत आहे. कंपनीने गेल्या वर्षी १.७ लाख नवीन नोकऱ्या निर्माण केल्या आहेत. या संदर्भात, त्यांच्या कंपनीने 2024 आर्थिक वर्षात संशोधन आणि विकासावर $437 दशलक्ष खर्च केले. जिओ फायनान्शियल सर्व्हिसेस समाजासाठी उत्तम मूल्य निर्माण करण्यात सतत गुंतलेली आहे. रिलायन्सच्या एजीएमला संबोधित करताना मुकेश अंबानी म्हणाले की, भारत वेगाने प्रगती करत आहे. आयएमएफचा अंदाज आहे की 2027 पर्यंत ती जगातील तिसरी सर्वात मोठी अर्थव्यवस्था बनेल आणि जर्मनी आणि जपानला मागे टाकेल.
