विसरलेला मोबाईल घेण्यासाठी बांधकामाच्या ठिकाणी आलेल्या परप्रांतीय मजुराचा उंचावरून पडून दुर्दैवी मृत्यू झाला.हरिओमनगर येथील बांधकामाच्या ठिकाणी ही घटना घडली. आनंद कपूरचंद मिश्रा (वय २७, रा. जौनपूर, उत्तर प्रदेश) असे मृताचे नाव आहे. पोटात व गळ्यातून आरपार गेलेल्या लोखंडी सळईमुळे मोठ्या प्रमाणात रक्तस्त्राव झाला. गंभीर अवस्थेत त्याला उपचारासाठी सीपीआरमध्ये आणले असता उपचारापूर्वीच मृत्यू झाल्याचे डॉक्टरांनी सांगितले.
हरिओमनगर येथे बांधकाम ठेकेदार विनोद राठोड यांनी घराचे काम घेतले आहे. येथे परप्रांतीय मजूर गवंडी काम करत होते. त्यांच्याकडेच कामाला असलेल्या आनंद मिश्रा याने मंगळवारी सुटी घेतली होती. तो बिहारी मित्रांना भेटण्यासाठी साडेचारच्या सुमारास काही वेळ आला होता. पहिल्या मजल्यावरून खाली उतरल्यानंतर त्याचा मोबाईल विसरल्याचे त्याच्या लक्षात आले. तो मोबाईल घेण्यासाठी पहिल्या मजल्यावर गेला होता. इतक्यात पाय घसरून तो खाली कोसळला. पिलरची सळई त्याच्या गळ्यातून आरपार गेली.
