आटपाडी येथे महिलेने तब्बल अडीच लाख रुपये घरातून लांबवले. पैसे चोरल्याची कबुली दिली. परंतु पैसे देण्यास टोलवाटोलवी केली. त्यामुळे तिच्याविरुद्ध चोरीची फिर्याद नोंदवण्यात आली. दत्ता भगवान हाके ( वय ४५, करगणी, ता. आटपाडी) यांच्या राहत्या घरातून १७ ऑक्टोबर रोजी सकाळी दहाच्या सुमारास अडीच लाख रुपयांची रक्कम लांबवण्यात आली. हाके यांना मनीषा हिरामण वाघमारे (रा, मांडवा कोरडे, ता.अलिबाग, जि. रायगड) या महिलेचा संशय होता. या महिलेनेच रक्कम चोरली असावी असा संशय हाके यांना होता. हाके त्या दिवशी घराबाहेर गेले. तेव्हा मनीषा हिने त्यांच्या राहत्या घराची कडी काढून प्रवेश केला. कपाटावर ठेवलेली अडीच लाख रुपयांची रोकड असलेली बॅग घेऊन तिने पलायन केले. तिच्याशी हाके यांनी संपर्क साधला, तेव्हा मी पैसे नेल्याचे तिने सांगितले. आज आणून देतो, उद्या देतो असे सांगत तिने टोलवाटोलवी केली. पैसे दिले नाहीत. अखेर दत्ता हाके यांनी आटपाडी पोलीस ठाण्यात मनिषा वाघमारे हिच्याविरोधात फिर्याद नोंदविली.
आटपाडीत महिलेचा अडीच लाखावर डल्ला
