आगामी विधानसभा निवडणुकीच्या पार्श्वभूमीवर प्रत्येक मतदारसंघात नेते मंडळींचा प्रचार दौरा सुरू झालेला पाहायला मिळत आहे.खानापूर आटपाडी विसापूर विधानसभा मतदारसंघातील महायुतीचे अधिकृत उमेदवार म्हणून सुहासभैया बाबर यांना मोठा प्रतिसाद मिळत आहे. लाडक्या बहिणी जिथे जाईल तिथे मदत करत असतानाच मासाळवाडी येथे धनगर समाज बांधवांनी ओवी गात स्व. आमदार अनिलभाऊ यांचे स्मरण केले आणि भंडाऱ्याची उधळण करून उपस्थितांनी बिरोबाच्या नावानं चांगभलं असा एकच जयघोष केला.
‘आले किती गेले किती संपले भरारा अनिल भाऊंच्या कामाचा आजही दरारा’ अशा शब्दात ओवी म्हणून धनगर बांधवांनी सुहास बाबर यांना शुभेच्छा दिल्या. यावेळी जिल्हा मध्यवर्ती बँकेचे संचालक तानाजीराव पाटील उपस्थित होते. यावेळी बोलताना सुहास बाबर म्हणाले स्वर्गीय आमदार अनिलभाऊंच्या राजकीय वाटचालीत धनगर समाजाचे मोलाचे योगदान आहे. त्यामुळे भविष्यात मतदारसंघातील धनगर समाजाचे प्रश्न सोडविण्यासाठी कटिबद्ध राहीन असे अभिवचन त्यांनी दिले.
