इस्लामपूर विधानसभा मतदारसंघातील मविआचे उमेदवार जयंत पाटील यांची प्रचार शुभारंभ सभा आयोजित करण्यात आली होती. यावेळी नदीवरील, ओढ्यावरील, भव्यपूल, नदीवरील घाट यांसारखी अशक्य कोटीतील विकासकामे साकारतानाच कोणत्याही देवस्थानचा विकास करण्याचे काम साहेबांनी बाकी ठेवले नाही. वाळवा तालुक्यात तर असंख्य विकासकामे सत्ता असो वा नसो कोट्यवधींचा निधी आणून जयंत पाटीलच करू शकतात हे साहेबांनी सिद्ध केले आहे असे प्रतिपादन जेष्ठ राष्ट्रवादी (शरद पवार) नेते दिलीप तात्या पाटील यांनी वाळव्यात बोलताना केले.
कोटभाग येथील हनुमान मंदिराच्या प्रांगणात दिलीप तात्यांच्या हस्ते श्रीफळ वाढवून प्रचार शुभारंभ करण्यात आला. दिलीप तात्या म्हणाले, विरोधी उमेदवार आमदारकी मिळवण्यासाठी निवडणूक लढवत आहेत तर आमचा उमेदवार मुख्यमंत्री होणार हे सत्य आहे. साहेब सप्तपदीनंतर आठव्यांदा निवडणूक लढवत आहेत. याचा विरोधकांना विसर पडला आहे साहेबांनी काहीच विकास केला नाही असा अपप्रचार करणाऱ्या विरोधकांना त्यांनी उत्तर दिले.
