आजकालच्या जीवनामध्ये प्रत्येकालाच कर्जाची गरज ही भासतेच. कर्ज किंवा क्रेडिट कार्डसाठी अर्ज केल्यानंतर बँका सरसकट ते देत नाहीत. कर्ज किंवा क्रेडिट कार्ड मिळण्याचे अनेक निकष असतात. त्यात सिबिल स्कोअर हा एक महत्त्वाचा निकष असतो.हा ३ अंकी आकडा तुमची पात्रता सांगतो.
कर्जाच्या अटी निश्चित करण्यासाठी बँका सिबिल स्कोअर तपासतात. तो समाधानकारक असेल तरच कर्ज किंवा क्रेडिट कार्ड मंजूर करतात.चांगला सिबिल स्कोअर आपल्याला कमी व्याजदरानं कर्ज मिळविण्यात मदत करतो. बँकबझारच्या मते, ७५० ते ९०० च्या दरम्यानचा सिबिल स्कोअर चांगला मानला जातो. हा सिबिल स्कोअर चांगला ठेवण्यासाठी आपल्याला काही गोष्टींची काळजी घेणं आवश्यक आहे. त्या कोणत्या पाहूया….
पेमेंट हिस्ट्री
तुमच्या सिबिल स्कोअरवर तुमच्या क्रेडिट हिस्ट्रीचा सर्वात मोठा परिणाम होतो. क्रेडिट हिस्ट्री हा कर्ज आणि परतफेडीच्या व्यवहारांचा सारांश असतो. तुम्ही तुमची थकबाकी वेळेवर भरत आहात की नाही ते यावरून कळतं. आपण पेमेंट चुकवल्यास त्याचा आपल्या स्कोअरवर नकारात्मक परिणाम होतो. वेळेवर पैसे भरले जावेत किंवा नियोजित तारखा चुकू नयेत म्हणून रिमाइंडर लावून ठेवा.
क्रेडिट युटिलायझेशन रेश्यो
हा रेश्यो बँकेनं दिलेल्या क्रेडिट मर्यादेच्या संदर्भात वापरलेली क्रेडिट रक्कम दर्शवते. कमी क्रेडिट युटिलायझेशन रेशो असणं म्हणजे आपल्या एकूण उपलब्ध क्रेडिटचा एक छोटासा भाग वापरला जाणं. अशावेळी बँकांना वाटतं की, तुम्ही तुमची पत व्यवस्थित सांभाळत आहात. तथापि, अधिकाधिक क्रेडिट वापर गुणोत्तर कर्जावरील अधिक अवलंबित्व अधोरेखित करतो. सिबिल स्कोअर मोजण्यासाठी हे गुणोत्तर एक महत्त्वाचा घटक आहे.
थकबाकी भरणे
आपली सर्व थकबाकी वेळेत भरली जातेय याची खात्री करा. तसं न केल्यास आपल्या क्रेडिट रिपोर्टवर नकारात्मक परिणाम होईल. त्यामुळं तुमचा सिबिल स्कोअर कमी होईल.
सिबिल रिपोर्ट
सिबिल रिपोर्टमध्ये तुमच्या मागील आणि चालू क्रेडिट अकाउंटचा तपशील दाखवला जातो. या अहवालातील कोणत्याही चुकीचा परिणाम आपल्या सिबिल स्कोअरवर होऊ शकतो. आपल्या सिबिल अहवालाचा नियमित आढावा घ्या. चुका तपासा आणि त्या सुधारण्यासाठी बँकांना अहवाल द्या.
डेट टू इनकम रेशो
आपल्या उत्पन्नाचा किती भाग कर्जाच्या देयकांसाठी जातो हे दर्शवणारे हा रेशो असतो. कर्जाचं प्रमाण जास्त असणं हे कर्जावर अधिक अवलंबित्व दर्शवितं. आपलं सध्याचं उत्पन्न नवीन क्रेडिट मिळविण्यासाठी अपुरं आहे. तथापि, कर्जाचं प्रमाण कमी असणं म्हणजे आपल्या उत्पन्नाचा कमी भाग कर्जाच्या देयकांसाठी जातो. यामुळं आपला क्रेडिट स्कोअर वाढतो. तसंच, कर्ज किंवा क्रेडिट कार्ड मिळण्याची शक्यता वाढते.
जुने क्रेडिट कार्ड खाते बंद करू नका
जुने क्रेडिट कार्ड खाते बंद केल्यास कार्डशी संबंधित दीर्घ क्रेडिट हिस्ट्री पुसली जाईल. जर तुमच्याकडं बराच काळ क्रेडिट कार्ड असेल तर खाते बंद करण्याचा विचार करू नका. तथापि, आपण नवीन क्रेडिट कार्डसाठी खाते बंद करू शकता.
