हातकणंगले तालुक्यातील नागाव येथील गाडीवड परिसरात अमित चिंतामणी सोळंकुरे यांचे शेत आहे. काल मंगळवारी त्यांनी आपल्या शेतातील आडसाली ऊस पेटवून तोड चालू केली होती. यावेळी उसाचा फड पेटवला असता शेतात लपून बसलेल्या बिबट्याने धूम ठोकल्याचे ऊस तोड मजुरांनी सांगितले. आज सकाळी शेतामध्ये शेतकरी गेले असता बिबट्याचे एक पिल्लू होरपळून मेल्याचे निदर्शनास आले. त्यांनी तात्काळ ही बातमी वनविभाग व शिरोली एमआयडीसी पोलिसांना कळविली. त्यानंतर वनविभाग व पशुवैद्यकीय टीम घटनास्थळी दाखल झाली. वनविभागाने पंचनामा केला असता ते बिबट्याचे पिल्लू असल्याचे सांगितले.
पशुधन अधिकाऱ्यांनी जागेवरच शवविच्छेदन करून त्या बिबट्याचे दहन केले. यावेळी वनपाल एम.एस. पोवार, आरएफओ रमेश कांबळे, पशुधन विकास अधिकारी अश्विनी बोगार्डे, वनरक्षक विकास घोलप, रेस्क्यू टीचे अमोल चव्हाण, नागावचे पोलीस पाटील बाबासो पाटील हजर होते. यावेळी वन अधिकाऱ्यांनी या परिसरात दोन दिवस ड्रोनच्या साहाय्याने एक टीम कार्यरत ठेऊन पाहणी करणार असल्याचे सांगितले. या पिलांच्या शोधात बिबट्या रात्री येण्याची शक्यता आहे. तसेच याची आणखीन पिल्ले या परिसरात असण्याची शक्यता आहे. सद्या सर्वत्र ऊसतोड चालू आहे. त्यामुळे शेतकऱ्यांनी सावधानता बाळगावी, असे आवाहन त्यांनी केले आहे. याठिकाणी बिबट्याचा वावर असल्याचे सिध्द झाल्याने नागाव परिसरात एकच खळबळ उडाली आहे.
