लोकसभा तसेच विधानसभा निवडणुकीत अनेक राजकीय समीकरणे बदलल्याचे चित्र दिसून आले. अनेक पक्षप्रवेश देखील पहायला मिळाले. विधानसभा निवडणुकीत महायुतीला यश मिळाले. आता आगामी स्थानिक स्वराज्य संस्थांच्या निवडणुकीकडे लक्ष लागलेले आहे. अनेकांनी या निवडणुकीसाठी तयारी देखील दर्शवली आहे. विधानसभा निवडणुकीत दिलेला शब्द पूर्ण करण्याची वेळ नेत्यांवर आली आहे.
विधानसभा निवडणुकीत उमेदवारी देत असताना आपल्याच पक्षात कार्यकर्त्यांवर झालेला अन्याय थोपवण्यासाठी राज्यातील वरिष्ठ नेत्यांनी विधान परिषद, महामंडळ आणि समित्यांच्या पदावर नियुक्ती करण्याचं आश्वासन दिलं होतं.इचलकरंजी शहरात देखील अनेक राजकीय समीकरणे पहायला मिळाली. इचलकरंजी विधानसभा मतदारसंघातून भाजपचे माजी आमदार सुरेश हळवणकर यांना थांबवत नव्याने भाजपमध्ये प्रवेश केलेल्या राहुल आवाडे यांना संधी देण्यात आली. त्यामुळे आगामी होऊ घातलेल्या विधान परिषदेसाठी भाजपमधून माजी आमदार सुरेश हाळवणकर यांचे नाव आघाडीवर आहे. तर भाजप नेते महेश जाधव हे देखील विधान परिषदेवर जाण्यासाठी आग्रही आहेत.
माजी आमदार सुरेश हाळवणकर यांना तात्काळ विधानपरिषदेवर संधी द्यावी, विलंब का केला जात आहे, अशा तिखट भावना भारतीय जनता पार्टीवर प्रेम करणाऱ्या मतदारांतून व्यक्त होत आहेत. दरम्यान, हाळवणकर विरोधी लॉबी अधिक सक्रिय झाल्याची चर्चा आहे.
