मोटारसायकल चोरी, बंद घराचे कुलूप कोयंडा तोडून त्यांचे घरातील रोख रक्कम तसेच सोन्याचे दागिने, यासह चारचाकी गाडीत बसवून महिलेच्या गळ्यातील सोने चोरलेल्या घटनेतील असे एकूण विविध तीन गुन्हे उघडकीस आणत, २ आरोपींना अटक करून सुमारे २ लाख ४० हजार रुपये किंमतीचा मुद्देमाल सांगोला पोलिसांनी जप्त केला असल्याची माहिती पो. नि. भीमराव खणदाळे यांनी दिली आहे.
सांगोला शहर व ग्रामीण भागातील चोरी घटनांना आळा घालण्यासाठी व गुन्हे उघडकीस आणणेकरिता सांगोला पोलिस ठाणेकडील तपास पथक नेमून पोलिस निरीक्षक, सांगोला पोलिस ठाणे यांनी दिलेल्या सूचनाप्रमाणे सांगोला पोलिस ठाणेकडील कलम ३०३ (२) मधील फिर्यादी सुनील शामराव गायकवाड रा. कडलास, ता. सांगोला जि. सोलापूर यांची मोटारसायकल माउली हॉटेल मिरज रोड सांगोला येथुन चोरी झालेबाबत अज्ञात आरोपीविरुध्द गुन्हा दाखल होता.
सदरच्या घडलेल्या घटना उघडकीस आणण्याबाबत पोलिस अधीक्षक अतुल कुलकर्णी यांनी सांगोला पोलिसांना निर्देश दिले होते. या अनुषंगाने सांगोला पोलिस ठाणेकडील पथक चोरीचे गुन्हे उघडकीस आणणेबाबत तपास करीत असताना तांत्रिक विश्लेषणाचे आधारे चोरी करणाऱ्या इसमास ताब्यात घेऊन त्याच्याकडे विचारपूस केली असता, सुनील मंडले (वय २६, रा. पिंपरी खुर्द, ता. आटपाडी, सध्या रा. देवापूर, ता. माण, जि. सातारा) याचे नाव निष्पन्न करुन त्याने मोटारसायकल चोरी केलेबाबत कबुली देवून ती मोटारसायकल जप्त करुन आरोपीस अटक केली.
सदरची कामगिरी पोलिस अधीक्षक सोलापूर ग्रामीण अतुल कुलकर्णी, अप्पर पोलिस अधीक्षक सोलापूर ग्रामीण प्रीतमकुमार यावलकर, उपविभागीय पोलिस अधिकारी विक्रांत गायकवाड, पो. नि. भीमराव खणदाळे यांच्या मार्गदर्शनाखाली पो. ना. बाबासाहेब पाटील, पो.कॉ. लक्ष्मण वाघमोडे तसेच सायबर पोलिस ठाणेकडील पोहेकॉ युसूफ पठाण यांनी मदत केली आहे.
