देशातील कोट्यवधी लोकांना येत्या 15 ऑगस्टपासून टोल टॅक्समधून मोठी सवलत मिळणार आहे. सरकार 15 ऑगस्ट 2025 पासून कार, जीप, व्हॅन यांसारख्या खाजगी वाहनांसाठी नवीन फास्टॅग (FASTag) वार्षिक पास लागू करणार असल्याने महामार्गावरील प्रवास आणखी सोपा होणार आहे, जो एक वर्षासाठी वैध असेल. केंद्र सरकार टोल धोरणाचा विचार करत असल्याची चर्चा बऱ्याच दिवसांपासून सुरू होती तर,आता सरकारच्या घोषणेमुळे सर्वसामान्य टोल टॅक्समधून सुटकेचा निश्वास सोडू शकतात.
तुम्ही अनेकदा तुमच्या गाडीने महामार्गावर प्रवास करत असाल तर तुमच्यासाठी एक आनंदाची बातमी आहे. सरकार या वर्षी ऑगस्टमध्ये कार, जीप, व्हॅन यासारख्या खाजगी वाहनांसाठी नवीन FASTag वार्षिक पास जारी करण्याची तयारी करत आहे, जो वर्षासाठी वैध असेल.
या पासची किंमत 3,000 रुपये विशेषतः कार, जीप आणि व्हॅनसारख्या खाजगी, गैर-व्यावसायिक वाहनांसाठी आहे. हा पास सक्रिय झाल्यानंतर एक वर्ष किंवा 200 ट्रिप (जे आधी पूर्ण होईल) साठी वैध असेल. वापरकर्ते राष्ट्रीय महामार्ग ॲपवरील एका विशेष विभाग आणि NHAI आणि MoRTH च्या अधिकृत पोर्टलद्वारे पास सक्रिय आणि रिन्यू करू शकतील.
वार्षिक फास्टॅग पास कसा मिळवायचा ?
लवकरच राजमार्ग यात्रा ॲप आणि राष्ट्रीय महामार्ग प्राधिकरण (NHAI) आणि रस्ते वाहतूक मंत्रालय (MoRTH) च्या अधिकृत वेबसाइटवर एक लिंक उपलब्ध करून दिली जाईल ज्याद्वारे वार्षिक फास्टॅग पास सक्रिय आणि रिन्यू करता येईल.
सरकारच्या नवीन वार्षिक फास्टॅग योजनेअंतर्गत खाजगी वाहन मालक देशभरातील राष्ट्रीय महामार्ग आणि एक्सप्रेसवेवर एकदा 3,000 रुपये रिचार्ज करून वारंवार टोल न भरता प्रवास करू शकतील.
वैधता संपल्यानंतर रिन्यू करता येईल. सध्या, 340 रुपयांचा मासिक पास घेणाऱ्यांना वर्षाला 4,080 रुपये खर्च करावे लागतात आणि पास फक्त एका टोल प्लाझासाठी आहे. त्या तुलनेत, हा नवीन वार्षिक पास देशभरात अधिक किफायतशीर आणि वैध असेल, ज्यामुळे सोपा व स्वस्त प्रवास होईल.
