एकेकाळी अजित पवार (Ajit Pawar) यांचे विश्वासू म्हणून समजले जाणारे माजी आमदार विजय भांबळे राष्ट्रवादी काँग्रेसच्या फुटी नंतर शरद पवार यांच्यासोबत राहिले. पण आता त्यांनी शरद पवारांची साथ सोडून पुन्हा एकदा अजित पवारांकडे जाण्याचा निर्णय घेतला आहे. आज उपमुख्यमंत्री अजित पवार यांच्या उपस्थितीत मुंबई येथील महिला विकास मंडळ सभागृह नरिमन पॉईंट येथे भव्य असा पक्षप्रवेश सोहळा संपन्न होणार आहे. माजी आमदार विजय भांबळे यांनी अजित पवार गटात जाण्याचा निर्णय घेतल्यानंतर परभणी जिल्ह्यात शरद पवार गटाला चांगलाच धक्का बसला असल्याचे बोलले जात आहे. परभणी जिल्ह्यात दिवसेंदिवस शरद पवार गटामधून अजित पवार गटात मोठ्याप्रमाणावर पक्षप्रवेश होत आहेत. माजी आमदार बाबाजानी दुर्राणी देखील शरद पवारांची साथ सोडवून अजित पवारांकडे जाणार असल्याची चर्चा रंगत आहे.
माजी आमदार विजय भांबळे हे 2014 ते 2019 दरम्यान जिंतूर विधानसभा मतदारसंघाचे आमदार होते. जिंतूर आणि सेलू तालुक्यात विजय भांबळे यांची मोठी ताकद आहे. त्यांच्या कार्यकर्त्यांचं विस्तृत जाळं आहे. 2019 मध्ये झालेल्या विधानसभा निवडणुकीत विद्यमान पालकमंत्री मेघना बोर्डीकर यांच्याकडून भांबळे यांना पराभव पत्करावा लागला. त्यानंतर राष्ट्रवादी काँग्रेसमध्ये फूट पडली आणि माजी आमदार विजय भांबळे यांनी शरद पवार यांच्यासोबतच राहण्याचा निर्णय घेतला. नुकत्याच झालेल्या विधानसभा निवडणुकीत माजी आमदार विजय भांबळे यांनी शरद पवारांच्या राष्ट्रवादीकडून निवडणूक लढवली. पण त्यांचा दुसऱ्यांदा मेघना बोर्डीकर यांनी पराभव केला. राज्यात महायुतीचे सरकार आल्यानंतर पुन्हा एकदा विजय भांबळे हे अजित पवारांकडे जातील अशी शक्यता वर्तविण्यात येत होती.
गेल्या काही महिन्यांपासून भांबळे यांच्या पक्षांतर बदलाची चर्चा राजकीय वर्तुळात सुरू होती. परंतु विजय भांबळे यांनी स्पष्टपणे कधीच याचा खुलासा केला नाही. पण येत्या स्थानिक स्वराज्य संस्थांच्या निवडणुकीच्या पार्श्वभूमीवर ते अजित पवार गटात प्रवेश करू शकतात हे मात्र निश्चित होते. भांबळे यांच्या कार्यकर्त्यांची देखील हीच इच्छा होती. मागील महिनाभरात अजित पवार हे परभणी जिल्हा दौऱ्यावर येणार असल्याची चर्चा होती आणि या दौऱ्यातच विजय भांबळे हे भव्य असे शक्ती प्रदर्शन करून प्रवेश करतील असे बोलले जात होते. पण अजित पवारांचा परभणी दौरा झालाच नाही आणि आता पावसाळी अधिवेशन सुरू झाले असल्याने अजित पवारांचा लवकर परभणी जिल्हा दौरा शक्य नसल्याने माजी आमदार विजय भांबळे हे आज आपल्या कार्यकर्त्यांसह मुंबई येथे राष्ट्रवादी काँग्रेसमध्ये प्रवेश करणार असल्याचे स्पष्ट झाले आहे. सोशल मीडियावर तशा प्रकारच्या पोस्ट आता त्यांच्या कार्यकर्त्यांकडून टाकल्या जात आहेत.
