बॉलिवूडचा बादशाह शाहरुख खान (Shah Rukh Khan) सध्या ‘किंग’ या सिनेमाचं शूटिंग करत आहे. या सिनेमाच्या शूटिंगदरम्यान त्याला गंभीर दुखापत झाली. रिपोर्टनुसार, एका अॅक्शन सीनचं शूटिंग करताना शाहरुख खानच्या स्नायूंना दुखापत झाली आहे. तो उपचारासाठी अमेरिकेला रवाना झाला आहे. अमेरिकेत त्याच्यावर उपचार केले जातील आणि डॉक्टरांनी त्याला एक महिना विश्रांती घेण्याचा सल्ला दिला आहे.
रिपोर्टनुसार, शाहरुख खानच्या दुखापतीबद्दल अद्याप संपूर्ण माहिती समोर आलेली नाही, परंतु तो त्याच्या टीमसह उपचारासाठी अमेरिकेला गेला आहे. ही फार मोठी किंवा गंभीर दुखापत नाही, तर सामान्य स्नायूंची दुखापत आहे. स्टंट करताना शाहरुखला यापूर्वीही अनेकदा स्नायूंना दुखापत झाली आहे. असंही सांगण्यात आलं आहे की शस्त्रक्रियेनंतर डॉक्टरांनी त्याला एक महिना विश्रांती घेण्याचा सल्ला दिला आहे. त्यामुळे त्याच्या ‘किंग’ या सिनेमाचं शूटिंग आता सप्टेंबर किंवा ऑक्टोबरमध्ये सुरू होणार आहे.
चित्रपटांच्या शूटिंग दरम्यान शाहरुख खानला दुखापत होण्याची ही पहिलीच वेळ नाही. ‘डर’ चित्रपटाच्या शूटिंगदरम्यान, अभिनेत्याचा अपघात झालेला. १९९३ मध्ये देखील, एका शूटिंगदरम्यान, शाहरुखच्या पायाच्या बोटाला दुखापत झाली होती. ‘कोयला’ चित्रपटाच्या सेटवर शाहरुखला दुखापत झाली होती. इतकंच नव्हे तर, ‘शक्ती’ चित्रपटाच्या आयटम नंबर ‘इश्क कमिना’ दरम्यान, शाहरुखच्या पाठीला दुखापत झाली होती. त्यामुळे अभिनेत्यावर यूकेमधील एका रुग्णालयात शस्त्रक्रिया करण्यात आली. याशिवाय, ‘दुल्हा मिल गया’ चित्रपटातील एका अॅक्शन सीनच्या शूटिंग दरम्यान शाहरुखच्या डाव्या खांद्यालाही दुखापत झाली होती.
दरम्यान, ‘किंग’ हा सिनेमा सिद्धार्थ आनंद यांनी दिग्दर्शित केला असून हा सिनेमा २०२६ मध्ये प्रदर्शित होणार आहे. या चित्रपटात शाहरुखसोबत दीपिका पदुकोण, अभिषेक बच्चन, राणी मुखर्जी, अनिल कपूर आणि सुहाना खान सारखे कलाकार झळकणार आहेत. यापूर्वी शाहरुख ‘पठाण’, ‘जवान’ आणि ‘डंकी’ सारख्या चित्रपटांमध्ये दिसला आहे.
