पोलीस ठाण्यात दिलेल्या तकारी अर्जाचा अहवाल वरीष्ठांना पाठविण्यासाठी ७ हजार रुपयांची लाच घेतल्याप्रकरणी दोषी ठरवून सेवानिवृत्त उपनिरीक्षकाला (Sub-Inspector) कराडच्या अतिरिक्त जिल्हा व सत्र न्यायालयाने दोन वर्षे सक्तमजुरी आणि ५ हजार रुपये दंडाची शिक्षा ठोठावली. भरत गोपाळ होळकर, असं शिक्षा झालेल्या आरोपीचं नाव आहे.
पाटण तालुक्यातील एकाने कराड शहर पोलीस ठाण्यात तक्रार अर्ज दिला होता. त्याचा अहवाल वरिष्ठांना पाठविण्यासाठी तत्कालीन पोलीस उपनिरीक्षक भरत गोपाळ होळकर यांनी तक्रारदाराकडे ७ हजार रुपये लाच मागितल्याने तक्रारदाराने लाचलुचपत प्रतिबंधक विभागाकडे तक्रार दाखल केली होती.
तक्रार अर्जाचा अहवाल वरीष्ठांना पाठविण्यासाठी तत्कालीन पोलीस उपनिरीक्षक भरत होळकर याला २० जुलै २०१४ रोजी कराड शहरातील पंचायत समितीच्या बाजूस असलेल्या दर्शनी रेस्टॉरंटसमोर सरकारी पंचांसमक्ष ७ हजार रूपयांची लाच घेताना सातारा लाचलुचपत प्रतिबंधक विभागाने रंगेहात पकडले होते. याप्रकरणी एसीबीच्या तत्कालीन पोलीस निरीक्षक वैशाली पाटील यांनी तपास करून दोषारोप पत्र न्यायालयात दाखल केले होते.
या खटल्याची मंगळवारी (५ ऑगस्ट) कराडच्या अतिरिक्त जिल्हा व सत्र न्यायालयात अंतिम सुनावणी झाली. या खटल्यात सहाय्यक जिल्हा सरकारी वकील एम. व्ही. कुलकर्णी व आर. डी. परमाज यांनी सरकार पक्षातर्फे एकूण ४ साक्षीदार तपासले. प्रत्यक्षदर्शी साक्षीदार, पंच, तपासी अंमलदार यांची साक्ष ग्राह्य धरून अतिरिक्त जिल्हा व सत्र न्यायाधीश डी. बी. पतंगे यांनी आरोपीस दोन वर्षे सक्तमजुरी आणि ५ हजार रुपये दंडाची शिक्षा ठोठावली. सरकार पक्षाला लाचलुचपत प्रतिबंधक विभागाचे पोलिस हवालदार रमेश वीरकर यांनी सहकार्य केले.
