वाळवा तालुक्यातील कराड तासगाव रस्त्यावर रेठरे हरनाक्ष फाट्यावर दुचाकीवरील ताबा सुटल्याने झालेल्या अपघातात सौरभ अरुण माने राहणार आंधळी तालुका पलूस या युवकाचा जागीच मृत्यू झाला आहे. तर सुशांत सुखदेव धोत्रे राहणार आंधळी हा त्याचा मित्र गंभीर जखमी झालेला आहे.
या अपघाताची नोंद ही इस्लामपूर पोलीस ठाण्यात झालेली आहे. सुशांत व सौरभ हे दुचाकीवरून पलूस येथे गेले होते. तिथून ते दोघे फिरण्यासाठी चिपळूण येथे निघालेले होते. भरपूर थंडी वाजू लागल्याने ते पाटण येथून माघारी फिरले.
कराड तासगाव रस्त्यावरून ते घरी येत असताना रेठरे हरणाक्ष गावाजवळील फाट्याजवळ समोरून एक वाहन आले आणि त्यावेळेस सौरभ याचा दुचाकी वरील ताबा सुटला आणि दुचाकी रस्त्यावरून घसरून शेतात जाऊन पडली.
तर सौरभ रस्त्यावर पडल्याने त्याच्या डोक्याला मनगटाला गंभीर मार लागल्यामुळे त्याचा जागीच मृत्यू झाला. तर जखमी सुशांत याला उपचारासाठी नागरिकांनी पलूस येथील सरकारी रुग्णालयात दाखल केले.
