राज्यातील स्थानिक स्वराज्य संस्थांच्या निवडणुकांची प्रक्रिया वेगाने सुरू झाली असून, राज्य निवडणूक आयोगाकडून प्रभाग आरक्षण सोडतीचा कार्यक्रम जाहीर झाला आहे. त्यानुसार इचलकरंजी महानगरपालिकेच्या सभागृहात ११ नोव्हेंबर रोजी प्रभाग आरक्षण सोडत होण्याची शक्यता व्यक्त करण्यात आली आहे. ही सोडत महानगरपालिका आयुक्त पल्लवी पाटील यांच्या अध्यक्षतेखाली निघणार आहे. सर्वोच्च न्यायालयाने दिलेल्या निर्देशानुसार राज्यातील सर्व स्थानिक स्वराज्य संस्थांच्या निवडणुका ३१ जानेवारी २०२६ पूर्वी पूर्ण करायच्या असल्याने, प्रशासनाकडून आवश्यक प्रक्रिया जलदगतीने सुरु आहे.
इचलकरंजी महानगरपालिकेत एकूण ६५ सदस्यांची निवडणूक होणार आहे. या ६५ जागांपैकी अनुसूचित जाती-जमाती, मागासवर्गीय आणि खुल्या प्रवर्गासाठी आरक्षणाचे प्रमाण राज्य निवडणूक आयोगाच्या निकषांनुसार निश्चित करण्यात येणार आहे. या निवडणुकीत ६ जागा अनुसूचित जाती-जमातींसाठी, १७ जागा मागासवर्गीय (ओबीसी) आणि ४२ जागा खुल्या प्रवर्गासाठी आरक्षित ठेवण्यात येणार आहेत. त्यापैकी एकूण ३३ जागा महिलांसाठी राखीव असतील. महिलांसाठीचे आरक्षण हे अनुसूचित जाती, जमाती, मागासवर्गीय आणि खुल्या प्रवर्गातील प्रमाणानुसार समान प्रमाणात वाटप करण्यात येणार आहे. यामुळे महिलांना स्थानिक स्वराज्य संस्थेत व्यापक प्रतिनिधित्व मिळणार असून, निर्णय प्रक्रियेत त्यांचा सहभाग अधिक बळकट होईल. आरक्षण निश्चित करताना लोकसंख्येच्या उतरत्या क्रमाचा विचार करण्यात येईल. अनुसूचित जाती, अनुसूचित जमाती आणि मागासवर्गीय प्रवर्गांचे प्रतिनिधीत्व लोकसंख्येच्या प्रमाणानुसार ठरवले जाईल. ही प्रक्रिया पूर्णपणे पारदर्शक पद्धतीने पार पाडली जाणार असून, सोडतीचे सर्व निकाल राज्य निवडणूक आयोगाच्या मान्यतेसाठी पाठवले जातील. ही संपूर्ण प्रक्रिया पूर्ण झाल्यानंतर इचलकरंजी महानगरपालिकेतील प्रभागनिहाय आरक्षण निश्चित होईल. स्थानिक प्रशासन, राज्य निवडणूक आयोग आणि नागरिक यांच्यासाठी ही निवडणूक पारदर्शक आणि नियमानुसार पार पडावी यासाठी आवश्यक सर्व तयारी सुरु आहे.
