अलीकडे अवकाळी पावसाने धुमाकूळ घातलेला दिसून येत आहे. काही ठिकाणी जोरदार वाऱ्यामुळे खूपच नुकसान सहन करावे लागत आहे. काल सांगोला तालुक्यात अवकाळी पाऊस आणि वादळी वाऱ्याने हजेरी लावली. वीज पडून जर्सी गाईचा तर अंगावर झाड पडून एका शेळीचा मृत्यू झाल्याची घटना घडलेली आहे.
काल सांगोला तालुक्यात संध्याकाळी वादळीवाऱ्यासह अवकाळी पावसाने हजेरी लावली. विजेच्या कडकडासह पाऊस झाला असून वीज पडल्याची घटना घडलेली आहे. संध्याकाळी साडेसात वाजण्याच्या सुमारास वाणीचिंचाळे गावात वादळी वाऱ्यामुळे अंगावर झाड पडल्याने निवृत्ती भाऊ घुणे यांची एक शेळी मरण पावली तसेच सावे गावातील मायाक्का मंदिराजवळ गावठाण परिसरात वीज पडून आनंद मारुती शेजाळे यांची जर्सी गाय मरण पावली पावली असल्याची माहिती तहसीलदार संतोष कणसे यांनी दिली.
तसेच एका म्हशीला थोड्या प्रमाणात खरचटले असल्याची माहिती मिळाली आहे. अनेकांच्या घरावरील पत्रे वादळी वाऱ्यामुळे उडाले असून त्यांचा संसार उघड्यावर आला आहे.
