इचलकरंजी येथील महासत्ता चौक परिसरातील गांधी हॉस्पिटल नजीक चारचाकी वाहनाने दुचाकीला समोरून दिलेल्या धडकेत दुचाकीस्वार जागीच ठार झाला. गौस इमाम मुजावर (वय ६५ रा. पाटील मळा) असे त्याचे नांव आहे. हा अपघात बुधवारी सायंकाळी साडेसहा वाजण्याच्या सुमारास घडला. हिट अॅण्ड सनच्या प्रकारानंतर घटनास्थळी मोठी गर्दी झाली होती. अपघाताबाबत गावभाग पोलिसांत नोंद करण्याचे काम सुरू होते. याबाबत मिळालेली माहिती अशी, सांगली रोड परिसरातील पाटील मळा येथे राहणारे गौस मुजावर हे आपल्या मोपेड दुचाकी (क्र. एमएच ०९ ईबी १२४१) वरुन महासत्ता चौकातून घराकडे निघाले होते.
गांधी हॉस्पिटल परिसरात त्यांच्या दुचाकीला जय सांगली नाक्याकडून येत असलेल्या भरधाव मारुती स्विफ्टने समोरून जोराची धडक दिली.त्यामध्ये गौस मुजावर हे दुचाकीसह रस्त्यावर आदळले. त्यांच्या डोक्याला गंभीर मार लागल्याने रक्तस्त्राव होऊन त्यांचा जागीच मृत्यू झाला. अपघातानंतर स्विफ्ट चालकाने घटनास्थळावरून पलायन केले स्विफ्ट कारच्या क्रमांकावरून त्याचा शोध घेतला जात आहे. अपघाताचे माहिती कळताच घटनास्थळी नागरिकांनी मोठी गर्दी केली होती. यावेळी या मार्गावरील वाहतूक काही काळ ठप्प झाली होती.
