इचलकरंजीतील शहापूर येथील दत्तनगर भागात पार्किंगमध्ये लावलेला टेम्पो त्यातील सूतमालासह चोरून नेल्याची घटना घडली.बनावट चावीचा वापर करून चोरट्याने ही चोरी सहज केली. सुताचे २०० बॉक्स, टेम्पो असा एकूण ५० लाख ७१ हजार ४१४ रुपयांचा मुद्देमाल चोरीला गेल्याची नोंद शहापूर पोलिस ठाण्यात झाली आहे.
याबाबतची फिर्याद टेम्पोचालक आकाश महावीर खोत (वय २९) याने पोलिसांत दिली. ही घटना दत्तनगर येथील अरिंहत पे पार्किंग याठिकाणी घडली.पोलिसांतून मिळालेली माहिती अशी, आकाश खोत याने कारखान्यातून सूतबॉक्स माल भरला. हा टेम्पो मालासह दत्तनगर-शहापूर येथील अरिहंत पार्किंग येथे रविवारी रात्री दहा वाजता पार्किंग केला होता.
या टेम्पोत ३० लाख ७१ हजार ४१४ रुपये किमतीचे सुताने भरलेले २०० नग बॉक्स मोठ्या प्रमाणात भरले होते. सोमवारी सकाळी अकरा वाजण्याच्या सुमारास सुताने भरलेला टेम्पो दिसला नाही. याबाबत पार्किंग व्यावसायिकालाही काहीच थांगपत्ता लागला नाही. सतत पाळत ठेवून चोरट्याने बनावट चावीने ही चोरी करण्याचे धाडस केल्याचा संशय पोलिसांना आहे.
याप्रकरणी चालक आकाश खोत याच्या फिर्यादीनुसार शहापूर पोलिसांनी गुन्हा दाखल केला आहे. या चोरीत २० लाख रुपये किमतीचा टेम्पो आणि ३० लाख ७१ हजार ४१४ रुपये किमतीचे सुताचे बॉक्स असा एकूण ५० लाख ७१ हजार ४१४ रुपयांचा मुद्देमाल चोरीला गेला.
