हातकणंगले तालुक्यातील हुपरी येथे बुधवारी म्हणजेच १४ ऑगस्टला मशाल मिरवणूकीचे आयोजन करण्यात आलेले आहे. हिंदुस्थानच्या स्वातंत्र्यासाठी आपल्या प्राणांची आहुती देणाऱ्या शूर-वीरांना मानवंदना देण्यासाठी व त्यांच्या कार्याची महती सदैव तेवत ठेवण्याच्या उद्देशाने शिवसेना व युवासेना यांच्यावतीने स्वातंत्र्यदिनाच्या पूर्वसंध्येला हुपरी ता. हातकणंगले येथे भव्य मशाल मिरवणुकीचे आयोजन करण्यात आल्याची माहिती माजी जिल्हाप्रमुख तथा गोकुळ दूध संघाचे संचालक मुरलीधर जाधव यांनी प्रसिद्धीपत्रकाद्वारे दिली. बुधवार दि. १४ ऑगस्ट रोजी सायंकाळी ठीक ६ वाजता हुतात्मा स्मारक मैदान, हुपरी ते प्रभातफेरी मार्गे नेताजी सुभाषचंद्र बोस पुतळा, हुपरी या मार्गावर भव्य मशाल मिरवणूकीचे आयोजन करण्यात आले आहे.
सदर मिरवणूकीस जिल्हा पोलीस प्रमुख महेंद्र पंडित, माजी खा. निवेदिता माने यांच्यासह शिवसेनेचे पदाधिकारी व हुपरी परिसरातील प्रमुख उपस्थित असणार आहेत. नागरिकांनी मोठ्या संख्येने सामील व्हावे, असे आवाहन करण्यात आले आहे.
