खानापूर तालुक्यातील बलवडी फाटा येथे ओमीणी व दुचाकीच्या झालेल्या अपघातात दोन तरुण ठार झाले तर एकजण जखमी झाला. पलूस- बलवडी फाट्यावर गजानन पेट्रोलपंपाजवळ सकाळी दहाच्या सुमारास हा अपघात झाला.राहुल बाबासो पाटील (वय २५), निवास गोविंद पाटील (वय ३५, दोघे आमणापूर ता. पलूस) अशी ठार झालेल्यांची नावे आहेत. तर भीमराव सुरेश कांबळे (पलूस) असे जखमीची नावे आहेत.
याबाबत महादेव सुरेश राजमाने (आमणापूर) यांनी विटा पोलिसांत फिर्याद दिली आहे. निवास व राहूल हे मंडळाचा गणपती आणण्यासाठी बलवडीकडे जात असताना दुर्दैवी घटना घडली.पोलिसांनी दिलेल्या माहितीनूसार भीमराव कांबळे त्याच्या ताब्यातील चारचाकी ओमीणी (एमएच १० एएन ५८७८) बलवडी फाट्यावरून पलूसकडे घेऊन निघाला होता.
भरधाव वेगात गाडी चालवून रस्त्याच्या परिस्थितीकडे दुर्लक्ष करून रस्त्याच्या चुकीच्या बाजूला गाडी घेऊन समोरून दुचाकीवरुन (एमएच १० ईसी ४१३९) बलवडी फाट्याकडे येणाऱ्या राहुल पाटील व निवास पाटील यांच्या दुचाकीला जोरात धडकी दिली. त्यात गंभीर जखमी होऊन त्यांचा मृत्यू झाला.
तर भीमराव कांबळे हा जखमी झाल्याचे फिर्यादीत म्हटले आहे. भीमराव कांबळे याच्याविरूध्द गुन्हा दाखल केल्याचे पोलिसांनी सांगितले. सहायक पोलिस निरीक्षक आर. ए. कांबळे अधिक तपास करीत आहेत.
