सध्या विधानसभा निवडणुकीची रणधुमाळी सुरू आहे. आज उमेदवारी अर्ज दाखल करण्याचा शेवटचा दिवस असल्यामुळे प्रत्येक मतदारसंघात चुरस पाहायला मिळत आहे. अशातच जनसुराज्य शक्ती पक्षाकडून हातकणंगले विधानसभा मतदारसंघातून दलित मित्र डॉ. अशोकराव माने यांनी सोमवारी शक्तिप्रदर्शन करीत त्यांनी उमेदवारी अर्ज दाखल केला. त्यांनी उमेदवारी अर्ज दाखल करण्यापूर्वी पेठवडगाव येथील ऐतिहासिक छत्रपती शिवाजी महाराज यांच्या पुतळ्यास अभिवादन करण्यासाठी कार्यकर्त्यांनी मोठी गर्दी केली होती.
आणि या गर्दीत माजी नगराध्यक्ष आणि युवक क्रांती आघाडीला नुकतीच सोडचिठ्ठी देऊन यादव आघाडीत दाखल झालेले मोहनलाल माळी अर्थात शेठजी यांना पाहताच डॉ. माने यांना पाठिंबा दिलेल्या माजी नगराध्यक्षा आणि युवक क्रांती आघाडीच्या सर्वेसर्वा प्रविता सालपे यांच्यासह कार्यकर्त्यांनी काढता पाय घेतला. दरम्यान जनसुराज्य शक्ती पक्षाचे उमेदवार डॉ. अशोकराव माने यांचा उमेदवारी अर्ज दाखल करण्यासाठी काढलेल्या रॅलीत या निमित्ताने मतभेद समोर आले.
