18 तारखेला प्रचाराचा अवधी संपत असून त्याच पार्श्वभूमीवर जास्तीत जास्त मतदारांपर्यंत पोहोचण्यासाठी राज्यभरात महायुती आणि मविआच्या नेत्यांनी प्रचाराचा, सभांचा धडाका लावला आहे. प्रचार संपायला काहीच दिवस असून त्यापूर्वी राज्यात ठिकठिकाणी जाऊन मतदारांशी संवाद साधण्याचे सर्वांचेच प्रयत्न आहेत. हातकणंगले तालुक्यातील अंबप येथे आ. राजूबाबा आवळे यांच्या प्रचारार्थ काढण्यात आलेल्या जनआशीर्वाद यात्रेचे गावकऱ्यांनी फुलांची उधळण करत थाटामाटात स्वागत केले. आवळे यांनी गावकऱ्यांचा आशिर्वाद घेऊन त्यांच्याशी संवाद साधला तसेच मतदारसंघाच्या सर्वांगीण विकासासाठी आणि उज्वल भविष्यासाठी हात चिन्हासमोरील बटण दाबून मतदानरूपी आशीर्वाद द्यावेत, असे आवाहन मतदारांना केले.
जनाशिर्वाद यात्रेतील प्रत्येक भेटीतून मिळणारा आशीर्वाद आणि विश्वास माझ्यासाठी प्रेरणास्रोत आहे. याच विश्वासावर आणि प्रेमावर पुन्हा एकदा विजयाचा एल्गार करू अशी खात्री त्यांनी व्यक्त केली. यावेळी महाविकास आघाडीचे पदाधिकारी, कार्यकर्ते, नागरिक मोठ्या संख्येने उपस्थित होते.
