आगामी विधानसभा निवडणुकीसाठी नियुक्त केलेल्या अधिकारी, कर्मचाऱ्यांसाठी टपाली मतदानाची सुरुवात शनिवार ता. ९ नोव्हेंबर पासून येथील व्यंकोबा मैदान परिसरातील डिकेटीई इंग्लिश मेडियम स्कूलमध्ये झाली. शनिवारी एकुण ४८९ इतके टपाली मतदान झाले आहे. यामध्ये ४३५ पोलींग स्टाफ, ३४ पोलिस तर १२ होमगार्डचा समावेश आहे. दरम्यान, रविवारी पुन्हा मतदान प्रक्रिया राबविण्यात येणार आहे.
विधानसभा निवडणुकीच्या पार्श्वभूमीवर मतदान प्रक्रियेसाठी विविध विभागांमधील अधिकारी, कर्मचारी यांच्या नियुक्त्या करण्यात आलेल्या आहेत. यामध्ये प्रामुख्याने शिक्षक तसेच पोलिस कर्मचारी आणि होमगार्ड यांचा समावेश आहे. इचलकरंजी विधानसभा मतदारसंघातील अधिकारी, कर्मचारी यांच्यासाठी डिकेटीई हायस्कूलमध्ये ५ मतदान सुविधा केंद्राची स्थापना करण्यात आलेली आहे. शनिवारी मतदान प्रक्रियेसाठी नियुक्त केलेल्या अधिकारी, कर्मचारी यांच्यासाठी टपाली मतदानाची सुरुवात झाली.
