१९ फेब्रुवारीला शिव जयंती मोठ्या उत्साहात साजरी करण्यात आली. अनेक विविध कार्यक्रमांचे आयोजन प्रत्येक भागात केलेले होते. खानापूर नगरपंचायतीच्यावतीने छत्रपती शिवाजी महाराजांच्या जयंतीनिमित्त शिवकालीन शस्त्र प्रदर्शन व समकालीन संदभांचे प्रदर्शन आयोजित केले होते. शिवकालीन इतिहासाचा अनुभव घेण्यासाठी शहरातील विद्यार्थी व नागरिकांनी गर्दी केली होती. सतत नाविन्यपूर्ण उपक्रम राबविण्यात अग्रेसर असणाऱ्या नगरपंचायत खानापूरच्यावतीने यंदाची शिवजयंती अनोख्या पद्धतीने साजरी करण्यात आली.
शस्त्रसंग्राहक अतुल मुळीक यांनी संग्रहित केलेल्या शिवकालीन शस्त्रांचे व संस्थांनकालीन मुद्रांकांचे प्रदर्शन व शिवसाम्राज्य प्रतिष्ठान हडपसर यांचे रवी पवार यांनी तयार केलेल्या ‘छत्रपती सूत्र विश्वाचे ‘हे समकालीन संदर्भाचे प्रदर्शन आयोजित करण्यात आले होते. शिवकालीन इतिहासाचा अनुभव घेण्यासाठी शहरातील विद्यार्थी व नागरिकांनी गर्दी केली होती. यावेळी ढाली, तलवारी वाघनख्या, दांडपट्टे अशी विविध प्रकारची शस्त्रे तसेच कुरुंदवाड, मिरज, कोल्हापूर अशा विविध संस्थानांचे मुद्रांक तसेच छत्रपती शिवाजी महाराजांच्या मूळ ७ पेटिंगच्या प्रती व समकालीन १२५ संदर्भाचे विश्लेषणासह पोस्टर्स असे प्रदर्शनाचे स्वरूप होते. यावेळी माजी जिल्हा परिषद सदस्य सुहास शिंदे नगराध्यक्षा सौ. सुमन पाटील मुख्याधिकारी सोनाली यादव यांच्यासह नगरसेवक, अधिकारी उपस्थित होते.
