इचलकरंजी आगामी महानगरपालिका निवडणुकीत महायुती विरोधात संघटीतपणे लढा देण्यासह व्यापक आघाडी करुन एकाच चिन्हावर निवडणुक लढवण्याचा निर्णय गुरूवारी झालेल्या महाविकास आघाडीच्या बैठकीत घेण्यात आला.आगामी निवडणुकीच्या पार्श्वभूमीवर शहर काँग्रेस कमिटीत महाविकास आघाडीची पहिलीच बैठक झाली.
सर्वोच्च न्यायालयाने सप्टेंबरपर्यंत सर्व स्थानिक स्वराज्य संस्थांच्या निवडणुका घेण्याचे आदेश दिले आहे. या पार्श्वभूमीवर इचलकरंजीतील महाविकास आघाडीतील घटक पक्षांच्या प्रमुखांची काँग्रेस कमिटीत पहिली बैठक झाली. बैठकीत, प्रदेश काँग्रेसचे सचिव शशांक बावचकर यांनी महाविकास आघाडी आत्तापर्यंत सत्तेच्या लालसेपोटी नव्हे तर सर्वसामान्यांचे प्रश्न सोडवण्यासाठी सदैव कार्यरत आहे. लोकसभा, विधानसभा निवडणुकीत जनतेने साथ दिली. त्यामुळे आता महानगरपालिका निवडणुकीला एकसंघपणे सामोरे जावूया. त्यासाठी आपणच गावचे राजे असल्याच्या अविर्भावात मिरवणाऱ्या नेत्यांना लगाम घालण्यासाठी जनतेचे आणि स्थानिक प्रश्न घेऊन सर्वांनी कामाला लागण्याचे आवाहन केले. राहुल खंजिरे यांनी निवडणुक कधीही जाहीर होऊ शकत असल्यामुळे त्याला सामोरे जाण्याची आपली तयारी हवी. त्यामुळे आत्तापासूनच तयारीला लागण्याचे आवाहन केले.
माजी आमदार राजीव आवळे यांनी, स्थानिक स्वराज्य संस्थांच्या निवडणुका या स्थानिक मुद्यांवरच होत असल्यामुळे लोकसभा, विधानसभा निवडणुकीत सत्ताधाऱ्यांनी जनतेला दिलेल्या आश्वासनांची पुर्तता केली नसल्याने जनतेची कशी फसवणुक होत आहे. यासह स्थानिक मुद्दे घेऊन जनतेसमोर जाण्याचे आवाहन केले. सागर चाळके यांनी सर्व विरोधक एकत्र येऊन एकाच चिन्हावर निवडणुक लढण्यासाठी प्रयत्न सुरु आहेत. त्यामुळे आपापल्या भागात चाचपणी करून कोण निवडणुक लढु शकतो, निवडुन येण्याची क्षमता कोणामध्ये आहे याचा सारासार विचार करून निवडणुकीला संघटीतपणे सामोरे जाण्याची तयारी करण्याचे आवाहन केले. मदन कारंडे यांनी अपयशाने खचुन न जाता जिद्दीने आणि संघटीतपणे काम करुया. त्यातून नक्कीच परिवर्तन घडेल, असा विश्वास व्यक्त केला. यांच्यासह काँग्रेसचे शहराध्यक्ष संजय कांबळे, उबाठा शिवसेनेचे शहराध्यक्ष सयाजी चव्हाण, भरमा कांबळे, बाबासाहेब कोतवाल, शिवाजी भोसले, इस्माईल समडोळे, रणजित जाधव यांच्यासह प्रमुखांनी आपली मते मांडली.
चर्चेअंती महापालिका निवडणुकीस संघटीतपणे लढा देण्याचा आणि त्यासाठी एकाच चिन्हावर ही निवडणुक लढण्यावर एकमत झाले. बैठकीस प्रकाश मोरबाळे, अब्राहम आवळे, राजवर्धन नाईक, मलकारी लवटे, प्रमोद खुडे, युवराज शिंगाडे, अभिजीत रवंदे, नागेश शेजाळे, रसुल नवाब, बिस्मिल्ला गैबान यांच्यासह महाविकास आघाडीतील घटक पक्षाचे प्रतिनिधी उपस्थित होते.
